Madaxweynaha Dowladda Puntland Dr. Cabdi-weli Max’ed Cali Gaas iyo wafdi ballaaran oo uu horkacayo ayaa dhowaaahan safaro kala duwan ku marayay deegaanada Gobolka Mudug, ayaa booqasho ku tagay deegaanada Garacad iyo degmada Towfiiq oo ka tirsan Gobolks Mudug.
Madaxweyne Gaas oo ay weheliyaan masuuliyiin ka tirsan golayaasha Dowladda ayaa waxa ay soo dhoweyn diiran kala kulmeen shacabka ku nool deegaanada Garacad iyo Towfiiq, waxayna dadweynuhu ruxayeen caleemo qoyan iyagoo sidoo kale watay sawirka Madaxweynaha dawlada Puntland Dr. Cabdi-weli Gaas.
Madaxweynaha Dowladda Puntland Dr. Cabdi-weli Max’ed Cali Gaas ayaa la hadlay dhamaan dadweynihii kala duwanaa ee kusoo dhoweeyey Garacad iyo Towfiiq, wuxuuna si isku mid ah ugu sheegay inuu ku faraxsan yahay sida wanaagsan ee ay usoo dhoweeyeen isaga iyo wafdigiisa.
Madaxweyne Gaas ayaa sidoo kale tilmaamay inuu si weyn u dareemay intii uu wadada kusii jiray dhibaatooyinka dhinaca nolosha ee ka jira deegaanada fog ee Gobolla Mudug, kuwaas oo ay ugu daran tahay wadooyinka oo aan hagaagsanayn, wuxuuna tilmaamay in Dawladdiisu ay si dhab ah u dabooli doonto baahiyaha jira intii awoodeeda ah, sidoo kalena shacabka Puntland laftooda looga baahan yahay inay ka qayb galaan horumarka deegaanadooda.
Dhinaca kale booqashooyinka uu Madaxweynaha Dowladda Puntland Dr. Cadi-weli Max’ed Cali Gaas ku marayo qaybo ka mid ah gobolada Puntland ayaa ah kuwo uu ugu kuudh gelayo xaalada guud ee dalka ka jirta, isla mar’ahaantaana ka mid ah balanqaadyadii uu ubalan qadaay shacabka Puntland in dawladiisu gaadhi doono deegaanada fog fog ee aan madaxdii ka horaysay hore u gaadhin.
