Madaxweynaha Dowladda Puntland Dr. Cabdiweli Maxamed Cali Gaas ayaa maanta si wayn loogu soo dhoweeyay magaalada Muqdisho, waxana garoonka Aadan Cadde ugu yimid Ra’iisal wasaare Cabdiweli Shiikh Axmed Maxamed iyo masuuliyiin ka tirsan golayaasha Dowladda Federaalka ah.
Wafdiga Madaxweynaha Puntland horkcayo ayaa u tagay Muqdisho ka qaybgalka Aaska AHN Ra’iisal wasaarihii hore ee Somalia Cabdirisaaq Xaaji Xuseen oo lagu wado beri in lagu duugo duleedka Muqdisho.
Gudoomiye ku xigeenka Barlamanka Cabdixamiid Shiikh Cabdisalaan, xildhibaaano, Wasiiro, Madaxweynihii hore ee Puntland Gen. Cadde Musee, Issimo, salaadiin iyo rayid ayaa ku wehelinaya madaxweynaha safarkiisa, waxana uu kulan is bariidin ah ugu tagay Madaxweynaha Somalia iyo gudoomiyaha Barlamanka.
Madaxweyne Cabdiweli Gaas ayaa booqasho kooban ku tagay safaarada Turkiga ee Muqdisho, waxana qado sharaf ku martiqaaday safiirka Turkiga Mr. Touran.
Ka dib intaas ayuu dhamaadkii Dr. Cabdiweli Gaas ka qaybgalay xaflad qaddo sharaf ah uu u fidiyay wafdiga Puntland Ra’iisal wasaaraha Somalia gurigiiisa, halkaasi oo laga jeedshay khudbaddo u badnaa taariikhda marxuumka iyo ujeedka socdaalka Wafdigan.
Madaxweyne Cabdiweli Gaas ayaa xusay in safarka wafdigiisa kooban ay ku yimaadeen Muqdisho ujeedkiisu yahay ka qaybgalka aaska Marxuumka, islamarkaasina meesha ka saaray inuu xiriir la leeyahay arrimo siyaasadeed.
Caawa ayaa waxa xarunta Madaxtooyada casho sharaf wafdiga Puntland ku martiqaaday madaxweynaha DF Somalia Xasan Shiikh Maxamuud.
-Dhamaad-
